Наполи го декласираше Челзи, Реал Мадрид одигра нерешено против ЦСКА Москва

Лесно може да се случи Англија да остане без свој преставник во четвртфиналето од Лигата на шампионите, и тоа по прв пат од сезоната 1995/96-та. Сити и Јунајтед своите натпревари ги завршија во групната фаза, додека по големиот пораз од Милан од 4:0 Арсенал веќе е елиминиран. На добар пат да ги заврши своите натпревари во најелитното клупско натпреварување е и Челзи кој синоќа доживеа убедлив пораз од Наполи со 3:1.

На стадионот „Сан Паоло“ во Неапол совладан беше тимот на Челзи со 3:1, иако гостите од Лондон поведоа со 1:0. Првиот гол во 27.минута го постигна Хуан Мата, а потоа следуваа головите на домашната екипа. Прво во 39.минута изедначи Езекил Лавеци на 1:1. На 2:1 зголеми Единсон Кавани во судиското надополнување на првиот дел. Конечните 3:1 ги постави Лавеци со својот втор гол во 65.минута.

До крајот на натпреварот, Наполи можеше да постигне барем уште еден гол, но сепак своите шанси не успеаја да ги реализираат Маџо и Хамшик.

Македонскиот најдобар фудбалер Горан Пандев ги одигра последните десетина минути од натпреварот откако во игра влезе на местото на Хамшик во 82-та минута.

На вториот денешен натпревар, ЦСКА Москва се избори за реми од 1-1 во дуелот со Реал Мадрид.

И покрај тоа што Кралевите требаа да се адаптираат на ниските температури во Москва, одиграа добро прво полувреме и поведоа преку голот на Кристијано Роналдо во 28. минута.

Сепак, ЦСКА Москва заигра многу подобро во вториот дел, домаќините покажаа солидни перформанси и нивниот труд беше награден со погодок во третата минута од судиското надополнување, кога во листата на стрелците се запиша Вернблом.

Подготвил: Јовица Симоновски